20:1 耶和華吩咐約書亞講：
20:2 「你吩咐以色列人講：恁著照我託摩西所給恁講的，為家己設立逃閃的城，
20:3 互彼個無意中錯誤人的，通走到遐，許個城通做恁閃避報人命的人的所在。
20:4 伊欲走到諸個城的一個，徛佇城門口，將伊的事情講互彼個城的長老聽。就收伊入城，互伊一所在，互伊踮佇中間。
20:5 報人命的若追伊，呣通用人的交佇伊的手；因為伊錯誤死伊的厝邊，平素無怨恨伊。
20:6 伊欲住佇彼個城，聽候徛佇會眾的面前受審判，聽候彼時的祭司長已經死，人的才通倒去到本城本家，就是伊所對遐走出來彼個城。」
20:7 就定著設佇拿弗他利山地，佇加利利的基低斯；及佇以法蓮山地的示劍；以及佇猶大山地的基列亞巴（就是希伯崙）；
20:8 閣佇約但彼旁，近耶利哥東勢，設立屬流便支派，佇曠野，佇平洋的比悉；及屬迦得支派基列的拉末；以及屬瑪拿西支派，巴珊的哥蘭。
20:9 諸個是為著以色列眾人及寄腳佇中間所設的城，互錯誤人的攏通走到遐，無死佇報人命的人的手，聽候伊徛佇會眾的面前。