1:1 耶和華的話臨到毗土珥的子約珥者。
1:2 老大人啊，恁著聽此個；此所在徛起的百姓啊，恁著俯耳孔。當恁的日，抑是恁的列祖的日，曾有此個事嗎？
1:3 恁著將此個事傳互恁的子，子傳互孫，孫傳互後代。
1:4 草蜢食剩的，第二種的草蜢來食伊；第二種食剩的，第三種的草蜢來食伊；第三種食剩的，第四種的草蜢來食伊。
1:5 酒醉的人啊，恁著醒來啼哭；好酒的人啊，著為著甜酒來啼哭，因為無酒通閣到你的嘴啦。
1:6 因為有一族上來我的地，強猛閣算得；伊的齒親像獅的齒，伊的牙親像母的獅的牙。
1:7 伊毀壞我的葡萄樹，剝我的無花果樹，互伊光溜溜，來棄拺伊，伊的枝變做白。
1:8 你著啼哭，親像在室女腰縖麻布，為著少年的時的丈夫啼哭。
1:9 素祭及奠酒攏無通到耶和華的殿；服事耶和華的祭司攏悲哀。
1:10 田拋荒，地悲哀；因為五穀毀壞，新酒乾去，油也欠缺。
1:11 作田人啊，恁著見誚；修理葡萄園者啊，恁著哀叫；為著小麥及大麥的緣故，因為田園的收成攏無去。
1:12 葡萄樹乾去；無花果樹枯焦。石榴、棗樹、蘋果，連田野一切的樹木也攏枯焦；人間的快樂攏消無。
1:13 祭司啊，恁著縖麻布啼哭；佇祭壇服事的啊，恁著哀叫；做我的上帝差用的人啊，恁著來穿麻布過暝，因為素祭及奠酒攏無通獻佇恁的上帝的殿。
1:14 恁著設一個禁食的聖日，召集嚴肅會，招集老大及國內一切徛起的百姓，到耶和華──恁上帝的殿，哀求耶和華。
1:15 慘啊！彼日，因為耶和華的日近啦。親像毀滅欲對全能者來。
1:16 食物豈呣是對咱的目前斷絕嗎？歡喜快樂豈呣是對咱的上帝的殿停止嗎？
1:17 種子爛佇土內；粟倉荒廢，粟倒壞；因為五穀乾拉去。
1:18 精牲哀哮到怎樣；牛群紛亂，因為無草；羊群也困苦。
1:19 耶和華啊，我求叫你，因為火燒滅曠野的草場；火焰燒盡田野的樹木。
1:20 田野的走獸向你喘；因為溪水乾去，火也燒滅曠野的草場。
