40:1 耶和華閣應約伯講：
40:2 好辯的豈通及全能者辯論嗎？辯駁上帝的，今著應伊！
40:3 約伯就應耶和華講：
40:4 看啊，我是微細！我欲用甚麼應答你？我用手掩我的嘴。
40:5 我已經講一擺，今無欲應；講二擺，也無閣講。
40:6 耶和華就對大風的中間應約伯講：
40:7 你著縖腰親像大丈夫；我問你，你著應我。
40:8 你欲廢無我的公平嗎？你欲擬定我有罪，來顯明家己做義嗎？
40:9 你有親像上帝彼號的手骨嗎？你會出聲起雷親像伊嗎？
40:10 今你通用尊貴威嚴做妝飾，用榮光美妙做衣服；
40:11 著傾出你滿滿的受氣，看一切驕傲的人，互伊降低；
40:12 看一切驕傲的人，壓扼互伊低，踏歹人佇所徛的地；
40:13 給做一下囥佇土粉，包密的面佇黑暗密的所在；
40:14 按呢我就承認你，真正你的正手會救你。
40:15 今你看河馬；我造你也造伊。伊食草親像牛；
40:16 看啊，伊的氣力在佇伊的腰，伊的能力佇伊腹肚的肌肉。
40:17 伊搖尾親像柏香樹；伊大腿的筋相連絡。
40:18 伊的骨頭親像銅管；伊的肢體親像鐵條。
40:19 伊是上帝諸個工的第一；創造伊的會用刀親近伊。
40:20 諸個山實在給伊出食物，田野的百獸也迫佇遐。
40:21 伊倒佇蓮花葉腳，睏佇歸部蘆竹的蔭影下及水窟內。
40:22 蓮花葉的蔭影遮蓋伊；溪邊的柳樹圍踅伊。
40:23 看啊，就若河水氾濫，伊也無驚；約但河漲到伊的嘴，伊也安然。
40:24 是誰會佇伊目睭金金的時，掠著伊，抑是用活銬貫伊的鼻啊？