4:1 提幔人以利法應講：
4:2 人若欲及你談論，你會嫌厭？總是是誰會家己約束無講話啊？
4:3 看啊，你曾教示多多人，軟弱的手你也互伊嚴硬。
4:4 欲跋倒的你用話扶伊；腳頭窩酸軟的你互伊勇健。
4:5 總是今代誌到佇你，你就昏迷，磕著你，你就驚惶。
4:6 你的倚靠豈呣是在佇你的敬畏嗎？你的向望豈呣是在佇你所行的純全嗎？
4:7 請你想看：無罪的人是誰有死無？正直的人佇甚麼所在受剪除？
4:8 照我看，用罪過種作，用惡毒做種子來撒的，所收成也是按呢。
4:9 上帝歕氣，就死無；對伊大受氣的風，就消滅。
4:10 獅的哮猛獅的聲攏息；獅仔肫的嘴齒攏拍折。
4:11 老的獅因為無通食就死；母的獅許個子也攏四散。
4:12 有代誌暗靜到佇我；我耳孔也聽見伊細細的聲。
4:13 對暝時、異象的思想，就是人睏重眠的時，
4:14 驚惶、愕愕惙臨到我，互我的百骨喀喀抖。
4:15 有神對我面前經過，我身軀的毛管 起來。
4:16 伊停，總是我看明伊的形狀；有像佇我目睭前。靜寂寂我聽見有聲講：
4:17 會死的人對佇上帝豈是義嗎？人對佇創造伊的豈是清氣嗎？
4:18 看啊，伊攏無信用伊的奴僕，也嫌伊的使者做愚戇；
4:19 何況許個徛起佇土厝，伊的根基在佇土粉，比蛀蟲卡快死者。
4:20 對早起到下昏，就抵著毀滅，永永無去，無人掛意。
4:21 伊布棚的索豈無對中央拔出來？伊的死，攏無智慧。