35:1 以利戶閣應講：
35:2 你掠此個做有合理，你講我的義贏過上帝的義啊，
35:3 你竟然講這有甚麼利益你？又閣我有甚麼利益卡贏我曾去犯罪？
35:4 我欲應你以及倚你的同伴。
35:5 你著抬目看天，看彼個穹蒼是比你卡高。
35:6 你若犯罪，會害著伊甚麼？你的過失若加添，會礙著伊甚麼啊？
35:7 你若行義，有甚麼互伊啊？抑是伊對你的手有得著甚麼啊？
35:8 你的歹關係你同類的人；你的義也關係世間人。
35:9 人因為受多多暴虐就喉叫，因為受強的人的壓制就哮救。
35:10 總是無人講：創造我的上帝佇叨落？伊是互人暝時唱歌者，
35:11 伊是教示咱贏過地上的走獸，互咱有智慧贏過佇空中的飛鳥的。
35:12 佇遐喉叫，總是無有應答的，因為歹人驕傲的緣故。
35:13 虛假的，上帝無欲聽；全能者也呣看顧伊。
35:14 何況你講，你無看見伊；此個案件佇伊的面前，你著且聽候伊啊！
35:15 總是今因為伊無受氣來責罰，也無不止注意侮慢，
35:16 所以約伯開嘴攏虛假，講多多無知的話。