33:1 約伯啊，今請你聽我的話，留心聽我一切的言語。
33:2 看啊，我今開我的嘴，我的舌佇嘴內講。
33:3 我的話欲講出我心內的正直；我的嘴唇欲老實講出所知的。
33:4 上帝的神創造我；全能者的氣互我得著活。
33:5 你若會，就著應我，起來徛排列佇我的面前。
33:6 看啊，我佇上帝的面前及你一樣，也是用土勒成的。
33:7 看啊，我無用威嚴互你驚，也無用我的勢力壓你。
33:8 你所講的，我實在有聽見，也有聽見你的話的聲，講：
33:9 我是清氣，無過失；我是清白，佇我心內也無罪。
33:10 看啊，伊尋空隙來攻擊我，掠我做伊的對敵，
33:11 伊用腳銬銬我的腳，致意看我一切的路。
33:12 看啊，講到這，你是不義，我欲應你，因為上帝比人卡大。
33:13 你啥事及伊相爭？因為伊的事伊攏無解明？
33:14 因為上帝講一擺、也二擺，總是人無致意。
33:15 人倒佇眠床睏到伊睏重眠的時，佇眠夢中，暝時的異象，
33:16 伊開的耳孔，蓋印佇所受的教示，
33:17 欲互人改換所計劃的事，遏止人的驕傲，
33:18 阻止伊的活命無落深坑，也伊的生命無對刀劍來死。
33:19 人佇眠床裡受痛疼的境界，佇伊的骨內親像交戰無息，
33:20 致到伊的生命厭賤食物，伊的心神厭惡好味。
33:21 伊的肉消瘦，無通看見；平素無看見的骨今攏凸出。
33:22 伊的生命近佇深坑；伊的活命近佇許個滅無生命的。
33:23 若有一個使者及伊佇，就是一千中的一個，替伊講話的，將人所著做的指示伊；
33:24 伊就施恩互伊，講：救伊免得落深坑；我已經尋著贖回伊的。
33:25 伊的肉比囝仔的肉卡幼軟；伊欲復倒少年的日子。
33:26 伊欲祈禱上帝，上帝歡喜伊，見著伊的面來歡喜；伊閣算彼人做義。
33:27 伊佇人的面前唱歌講：我有犯罪，顛倒是非，無利益我。
33:28 伊救贖我的生命免落深坑；我的活命也欲看見光。
33:29 看啊，諸個一切的事上帝行佇人二擺、三擺，
33:30 為著欲對深坑救伊的生命倒轉，互伊得著活命的光照伊。
33:31 約伯啊，你著俯耳孔聽我的話，著靜靜，我就欲講。
33:32 你若有話通講，就應我；做你講，因為我愛掠你做義。
33:33 若無，你著聽我講；你著靜靜，我欲教你智慧。