23:1 約伯應講：
23:2 今我的哀怨算做悖逆；我所受的責罰卡重佇我的吐氣。
23:3 願我會知對怎樣尋上帝，互我通到伊的座位，
23:4 我欲排列案件佇伊的面前，我的嘴夠額通辯明。
23:5 我也得著知伊應我的話，也明白伊對我所講的。
23:6 伊豈欲用大權能及我計較嗎？的確無按呢！伊欲俯落聽我。
23:7 佇遐正直者會及伊辯論；按呢，我欲永遠脫離審判我的。
23:8 看啊，我進前去，伊無佇遐，我退後去，也無看見伊。
23:9 佇倒旁伊行代誌，我無看見伊，佇正旁伊踮密，我也無看見伊。
23:10 總是伊知我所行的路；伊試煉我了後，我欲親像過鍛煉的金。
23:11 我的腳隨伊的腳步；我執守伊的路，也無偏斜。
23:12 伊嘴唇的命令，我未曾違背；我對重伊嘴內的話，贏過我所著用的米糧。
23:13 伊有一定的心志，是誰會給伊越轉啊？伊的心所愛的，就行伊。
23:14 所給我定著的，伊欲成伊；此號的事伊猶有多多。
23:15 所以我佇伊的面前栗栗惙；我想著就驚。
23:16 因為上帝互我失膽；全能者互我栗栗惙。
23:17 因為我的驚惶呣是為著黑暗，也呣是因為黑暗遮蓋我的面。