17:1 我的氣絕啦，我的日子滅盡啦；我的墳墓便啦！
17:2 實在有譏刺我的佇我遮，我的目睭常常看見刺激我的事。
17:3 願你用準當互我，給我做保認佇你的面前。有是誰肯及我頓手？
17:4 因為你遮蓋的心互無明理，所以你無欲互升高。
17:5 人交付伊的朋友去互人搶奪，伊的子的目睭欲失明。
17:6 我成做百姓中的笑談；我互人涎呸到面裡。
17:7 我的目睭因為憂悶來煙暈；我的百體攏親像影。
17:8 因為按呢正直的人欲卬愕；無罪的人欲激勵家己來攻擊無敬虔的人。
17:9 義的人也欲堅守伊所行的路；手清氣的人欲愈加添伊的氣力。
17:10 總是恁眾人，請恁閣來！因為恁中間，我尋無一個智慧的人。
17:11 我的日子已經過身；我的計劃、我的心所想的已經斷絕。
17:12 掠暝做日，講：光近佇黑暗。
17:13 我若向望陰間做我的厝，我若舖眠床佇黑暗中，
17:14 我若對朽爛講：你是我的老父；對蟲講：你是我的老母我的姊妹；
17:15 按呢，我的向望佇叨落？我的向望是誰會看見啊？
17:16 到做一下安息佇土裡的時，這向望欲落到陰間的門閂遐。