13:1 看啊，這一切我的目睭攏看過；我的耳孔攏聽過，也明白。
13:2 恁所知的，我也知，我無卡輸恁。
13:3 我實在愛及全能者講話；我真愛及上帝理論。
13:4 總是恁是捏造白賊話的，攏是無路用的醫生。
13:5 願恁一概靜靜；才算是恁的智慧！
13:6 請恁聽我的理論，致意聽我的嘴的分訴。
13:7 恁欲為上帝來講不義的話嗎？為伊講詭詐的話嗎？
13:8 恁豈欲偏袒伊嗎？欲為上帝辯護嗎？
13:9 伊若查出恁，豈有好嗎？恁會騙伊親像騙人嗎？
13:10 恁若暗靜偏袒，伊的確欲責備恁。
13:11 伊的威嚴豈無互你驚嗎？伊的通驚畏豈無臨到恁嗎？
13:12 恁所紀念的箴言是親像火灰；恁的營寨是土糜的營寨。
13:13 恁靜靜，莫得插我！據在我講，就無論甚麼做伊來。
13:14 我啥事將我的肉咬佇我的嘴齒，將我的生命下佇我的手啊？
13:15 看啊，伊欲死我；我無通向望，總是我欲佇伊的面前表白我的所行。
13:16 這欲成做拯救我的，因為無虔誠的人得到伊的面前。
13:17 恁著細膩聽我的話，互我所辯論的入恁的耳孔。
13:18 看啊，我有排列我的案件，我知我欲得著稱做義。
13:19 是誰會及我辯論啊，有，我就靜靜來斷氣。
13:20 獨獨有二項莫得行佇我，我就無閃避離開你的面：
13:21 就是你的手勼倒轉，離開我遠遠；閣無用你的威嚴互我驚。
13:22 按呢，你叫，我就應；抑是互我講，你應我。
13:23 我的罪過及過失有偌多啊？求你互我知我的過失我的罪過。
13:24 你啥事掩你的面、掠我做你的對敵啊？
13:25 你豈欲搖動互風吹的樹葉嗎？追枯焦的草嗎？
13:26 因為你記載艱苦的事來辦我，閣互我擔當少年的時的罪過；
13:27 你用腳銬銬我的腳，致意看我一切的路，你給我的腳底畫定界限。
13:28 我欲受敗壞親像臭爛的物，親像著蛀蟲的衫。