1:1 烏斯的地曾有一人名叫約伯；彼人完全閣正直，敬畏上帝，離開諸個歹。
1:2 伊生七個子，三個查某子。
1:3 伊的家業有羊七千，駱駝三千，牛五百對，驢母五百隻，也有多多差用的人。按呢此人佇東方眾人的中間是最第一大。
1:4 伊許個子去設筵席佇逐人的厝照伊的日子，閣差人去請三個姊妹來，及飲食。
1:5 筵席的日已經滿，約伯差人叫來互聖潔。閣透早起來，照眾人的數額獻燒祭；因為約伯講：「豈採我的子有犯罪，心內棄絕上帝。」約伯常常按呢行。
1:6 有一日，上帝的眾子來家己徛佇耶和華的面前，撒但也來佇中間。
1:7 耶和華對撒但講：「你對叨落來？」撒但就應耶和華講：「我佇地上行來行去，遍行佇遐，對遐來。」
1:8 耶和華對撒但講：「你有留心佇我的奴僕約伯嗎？因為地上無人親像伊完全閣正直，敬畏上帝，離開諸個歹。」
1:9 撒但應耶和華講：「約伯敬畏上帝，豈無因端嗎？
1:10 你豈呣是用籬笆圍伊閣圍伊的家，及圍伊四面一切所有的嗎？伊的手所做的你賜福伊；伊的家業也佇地裡加添多多。
1:11 今你若伸你的手磕著伊攏總所有的；伊的確當面棄絕你。」
1:12 耶和華對撒但講：「看啊，伊一切所有的攏佇你的手頭；獨獨呣通下手佇伊的身軀。」撒但就對耶和華的面前出去。
1:13 有一日，約伯的子查某子抵仔佇大兄的家食飲酒，
1:14 有使者來約伯遐，給伊講：「牛犁田，驢母佇邊仔食草，
1:15 示巴的人忽然到，搶伊，用刀死許個奴僕；只有我一人走離，來報你。」
1:16 伊猶講的時，閣有一個來講：「上帝的火對天降落，燒羊群及許個奴僕來滅；只有我一人走離，來報你。」
1:17 伊猶講的時，閣有一個來講：「迦勒底人分做三隊忽然來，拍駱駝來搶伊，續用刀死許個奴僕；只有我一人走離，來報你。」
1:18 伊猶講的時，閣有一個來，講：「你的子你的查某子佇大兄的家食飲酒，
1:19 忽然，有大風對曠野吹來，拍厝的四角頭，厝倒壓佇少年人的頂面，就攏死；只有我一人走離，來報你。」
1:20 約伯就起來，拆裂外衫，剃頭，仆佇地裡來拜，
1:21 講：「我褪裼出老母的胎，也欲褪裼倒去遐；耶和華賞賜，耶和華提去。著謳咾耶和華的名。」
1:22 佇這一切的事約伯並無犯罪，也無掠上帝做無合。