40:1 恁的上帝講：恁著安慰，安慰我的百姓。
40:2 著對耶路撒冷講好話，閣報伊知，伊的交戰已經盡；伊的罪過已經赦；伊為著伊一切的罪，對耶和華的手加倍受刑罰。
40:3 有聲叫講：佇曠野備辦耶和華的路，佇沙漠的地，修平咱的上帝的大路。
40:4 諸個山谷攏欲填互伊淀，大細的山頭攏欲掘互伊低；彎越的欲改互伊直，嵁硈的欲修互伊平。
40:5 耶和華的榮光的確顯現；凡若有血氣者欲攏看見；因為這是耶和華親嘴講的。
40:6 有聲講：你著叫！伊講：我著叫甚麼？見若有血氣者攏親像草；伊的榮光攏親像山裡的花。
40:7 草會乾，花會謝，因為耶和華的氣吹佇伊的頂面；百姓真正是草。
40:8 草會乾，花會謝，獨獨咱的上帝的話的確永遠佇。
40:9 報好消息互錫安的啊，你著上高山；報好消息互耶路撒冷者啊，你著盡力出你的聲。著出聲呣免驚，對猶大的城講：看啊，恁的上帝！
40:10 看啊，主耶和華欲親像大權能者臨到；伊的手的確為伊掌權。看啊，伊的賞賜佇伊遐；伊的報答亦佇伊的面前。
40:11 伊欲親像牧者顧伊的羊群，伊欲用手伏倚羊仔子，抱伊佇胸前，慢慢導許個互羊仔吸奶者。
40:12 是誰曾用手心量諸個水，用手虎口量穹蒼，用斗貯大地的土粉，用秤秤山嶺，用天秤秤山頭啊？
40:13 是誰曾測 耶和華的心，抑是做伊的謀士來指教伊啊？
40:14 伊及是誰商量，是誰教示伊，將公平的路指示伊，閣將智識教示伊，將通達的道路指教伊啊？
40:15 看啊，萬百姓攏親像水桶的一滴水，閣親像天秤頂的塵埃；伊提諸個海嶼起來，親像極微細的物。
40:16 黎巴嫩無夠額通做火柴；其中的走獸無夠額做燒祭。
40:17 萬百姓佇伊的面前親像無物，互伊看極其無，就是空空。
40:18 恁究竟欲將是誰比並上帝，用甚麼形像及上帝比並啊？
40:19 偶像是師傅鑄造，銀匠用金安伊，給伊鑄銀鍊。
40:20 喪鄉人無力通獻此號物，就揀會朽壞的柴，為伊尋奇巧的師傅，祀會搖動的偶像。
40:21 恁豈未知嗎？恁豈未聽見嗎？對起頭豈無給恁講嗎？對設立地的根基恁豈無明白嗎？
40:22 主坐佇地的大圈；地上徛起的百姓親像草蜢。伊展開天親像帳幅，安置伊親像通徛起的布棚。
40:23 伊互君王歸佇無，互地上的審判官成做空虛。
40:24 是抵仔栽，抵仔種，伊的欉抵仔釘根佇地裡，伊一下吹佇伊頂面，就攏枯焦；捲螺風將伊吹去，親像草幼一樣。
40:25 至聖者講：恁欲用是誰比並我，互我及伊平啊？
40:26 恁抬目看頂面，看是誰創造諸個，照數目導許個萬軍出來，伊一個一個稱的名；因為伊的權能，閣因為伊的大權能大氣力，連一個亦無欠。
40:27 雅各啊，你啥事講，以色列啊，你啥事講，我的道路隱密佇耶和華？我的案件無得著上帝料理？
40:28 你豈未知嗎？你豈未聽見嗎？永永佇的上帝耶和華，創造地極者，伊無厭，亦無倦；伊的智慧無通測 。
40:29 厭倦者，伊互伊能力；軟茈者，伊加添伊的氣力。
40:30 少年人亦會厭會倦；勇壯的人亦會跋倒。
40:31 獨獨倚靠耶和華者欲得著新的氣力。欲親像鷹鳥展翅飛高；走亦無厭，行亦無倦。