16:1 恁著將羊仔獻互地方掌權者，對西拉向曠野，送到錫安城的山。
16:2 摩押徛起的百姓佇亞嫩的渡頭，親像四界飛的鳥，親像拆破的鳥仔巢。
16:3 你著設計謀，行公平，互你的影佇中晝的時親像黑暗暝，受趕逐的人互伊匿，逃走的百姓呣通給伊露出。
16:4 你著容允我諸個受趕逐的人及你相及踮。論到摩押，你著做伊閃匿的所在，脫離殘害者的面前。因為勒索人者歸佇無，毀滅的事息去， 踏人者對國中除滅。
16:5 欲有寶座因為慈愛來建設；欲有誠實者坐佇彼頂面，佇大衛的布棚內審判，求公平，緊緊行公義。
16:6 阮聽見摩押人的驕傲，伊驕傲到極；伊的自高、伊的驕傲、伊的大受氣；品嗙的話是空空。
16:7 所以，摩押欲為著摩押啼哭；人人攏欲啼哭。恁欲為著吉珥．哈列設的葡萄餅來吐氣，受拍真傷重。
16:8 因為希實本的田乾去，西比瑪的葡萄樹亦是按呢。列國的主遏折伊第一好的枝；諸個枝伸到雅謝湠到曠野，伊的枝伸出過海。
16:9 所以，我欲為著西比瑪的葡萄樹哀哭，及雅謝人的哀哭一樣。希實本、以利亞利啊，我欲用目屎灌沃你；因為恁收成果子及五穀的時，喝喊的聲忽然到。
16:10 對肥的田中搶去歡喜快樂；佇葡萄園的確無唱歌亦無歡喜的聲；踏酒的佇酒窟內無踏出酒；我互伊歡喜的聲息。
16:11 因為按呢，我的心腹為著摩押親像琴出聲；我的心腸為著吉珥．哈列設亦是按呢。
16:12 摩押人朝見的時，佇高的所在厭倦，閣到伊的聖所祈禱，亦成。
16:13 這是耶和華前論摩押所講的話。
16:14 總是現在耶和華的話講：「三年內，照長工的年限，摩押的榮光及伊的眾人欲抵著凌辱，所剩的人真少無上算。」