6:1 來啊，咱著歸倚耶和華！伊拆裂咱，也欲醫好咱；伊拍咱，也欲包咱的傷。
6:2 過二日伊欲互咱復活，到第三日伊欲互咱起來，咱就活佇伊的面前。
6:3 咱著認識耶和華，出力進前來識伊。伊穩當出現親像天光早的光，伊欲臨到咱親像雨，也親像春天的雨潤澤土地。
6:4 以法蓮啊，我欲怎樣款待你？猶大啊，我欲怎樣款待你？因為你的善良親像早起時的雲霧，閣親像緊緊乾的露水。
6:5 因為按呢，我用先知削；用我嘴內的話死；我的審判親像光發出。
6:6 因為我愛憐憫，呣愛祭祀；愛人識上帝，贏過燒祭。
6:7 總是背約親像亞當，佇遐向我行詭詐。
6:8 基列就是行歹者的城，染著血跡。
6:9 親像歸陣的賊，埋伏當人，祭司結黨，也親像按呢佇示劍的路人，閣實在行邪淫。
6:10 佇以色列家我看見極通厭惡的事；佇遐有以法蓮的淫行，以色列染著垃墋。
6:11 猶大啊，我互我受掠的百姓倒來的時，就欲為你備辦收割。