4:1 所以我佇主做囚犯的勸恁：行代誌著合佇所受的召。
4:2 凡事謙遜、溫柔、用吞，佇仁愛相寬容，
4:3 用和平相結聯，致意守聖神所賞賜的合一。
4:4 因為體一個，神一個，親像恁受召的向望也是一個。
4:5 主一個，信一個，洗禮一個，
4:6 上帝一個，做眾人的父，佇萬有的頂面，貫串佇萬有，佇萬有的。
4:7 總是用恩典互咱逐人，是照基督恩賜的份量。
4:8 所以講：伊升高的時，就掠許個受掠的，也將諸個恩賜分互人。（
4:9 今既然講伊升高，豈呣是伊曾降落佇地下嗎？
4:10 彼個降落的，就是彼個升高佇諸個天的頂面的欲充滿萬物。）
4:11 伊所賞賜的，有使徒，有先知，有傳福音的，有牧師及先生，
4:12 為著欲互聖徒齊備來做差用的工，起造基督的身體，
4:13 直到咱眾人佇信，以及識上帝的子來合一，到成一個完全的人，到得著基督的充滿來長成彼般，
4:14 欲互咱無閣做囝仔，互逐樣教示的風搖泏漂流，中著人的詭計及瞞騙，致到互人差謬的法術；
4:15 是佇仁愛講話真實，互咱佇萬項漸漸大，到佇彼個做頭者，就是基督，
4:16 對佇伊全身結合聯絡，就是對百節的相接應，照逐體該然的運動，致到身軀愈長大，佇仁愛家己起造。
4:17 所以我講伊，閣佇主證明伊，恁的所行呣通閣親像外邦人的所行，的心志空空。
4:18 的心思黑暗，隔斷佇上帝的活命，是對呣知影，的心剛硬；
4:19 既然喪失良心，就放縱家己佇邪僻，對貪來行逐樣的污穢。
4:20 若是恁學習基督，呣是按呢。
4:21 恁若果然聽見伊，閣佇伊受教示，照佇耶穌所有的真實，
4:22 就是論到從前的行做，恁褪去舊的人，就是照引誘人的私慾敗壞的；
4:23 閣恁心神換新，
4:24 穿彼個新的人；就是照上帝，用真理的義及聖來創造的。
4:25 所以，著除去白賊，逐人及伊的厝邊講真實，因為咱相共做體。
4:26 恁受氣，著呣通犯罪；有激受氣，呣通到日落，
4:27 也呣通互魔鬼有縫通入。
4:28 偷提的，莫得閣偷提；寧可著磨，親手做好的工，才有通分互欠缺的人。
4:29 恁的嘴攏呣通講出垃墋的話，獨獨著講好話，照及時的欠缺來造就伊，互聽的人得著恩典。
4:30 也莫得互上帝的聖神憂悶；就是所曾用來蓋印恁，到佇贖回的日的。
4:31 一切的苦毒、怨恨、受氣、喧嚷、誹謗，以及一切的惡毒，攏著對恁中間除去；
4:32 閣著用仁慈相款待，存憐憫的心，大家相赦免，親像上帝佇基督曾赦免恁一樣。