6:1 我看見日光的下面有一項災禍重重壓人的，
6:2 就是有人得著上帝賞賜伊錢財、好額、尊貴，致到伊的心所愛的無欠一項，總是上帝無互伊會食伊，反轉互外人來食伊。這也是空虛，也是大弊病。
6:3 人設使生一百個子，閣食長歲壽，歷過多多年，伊的心無得著享福來滿足，閣無得著埋葬；照我講，彼個無到期來墜落的胎比伊卡好。
6:4 因為伊佇空虛來，佇黑暗去，伊的名受黑暗蓋密，
6:5 閣伊無看見日頭，也攏無知覺；此個，比彼個卡平安。
6:6 彼人雖然活到一千年，閣一千年，總是無享福，眾人豈呣是攏歸一所在去嗎？
6:7 人的勞碌攏是為著口腹，心也無知足。
6:8 智慧的人比愚戇的人有甚麼卡贏啊？喪鄉的人佇眾人的面前知所通行的，有甚麼卡贏啊？
6:9 目睭所看的贏過心內的泛泛想。這也是空虛，也是掠風。
6:10 前所有的，已經久久號伊的名，知伊是人，伊也會及彼個比伊卡有力者來相爭。
6:11 已經有多多事加添空虛，對佇人有甚麼利益啊？
6:12 人一生虛度光陰，親像影過去，是誰會知甚麼事做人生前的利益啊？因為是誰會給人講伊過世了後，佇日光的下面欲有甚麼事啊？