14:1 「恁是耶和華──恁上帝的子兒。呣通為著死人割家己的身軀，也呣通佇你二蕊目睭的中央剃光光；
14:2 因為你做聖的百姓，來屬佇耶和華──你的上帝，耶和華對地上萬百姓中來揀你做伊特別的百姓。」
14:3 「見若可惡的物你攏呣通食。
14:4 你所通食的精牲就是諸個牛、綿羊、山羊、
14:5 鹿、及羚羊、小鹿、野山羊、麋鹿、赤羊、羌。
14:6 精牲中見若分蹄蹄拆做二旁的、反芻的精牲，恁攏通食伊。
14:7 總是許個反芻的抑是拆蹄的的中間，恁呣通食的就是諸個駱駝、兔、沙番──因為伊是反芻無分蹄，對佇恁是無清氣；
14:8 豬──因為伊有分蹄也無反芻，對佇恁是無清氣。的肉，恁呣通食，死的也呣通摸。
14:9 「佇水中恁所通食的是諸個：見有翅有鱗的恁攏通食；
14:10 見無翅無鱗的恁攏呣通食，對佇恁就無清氣。
14:11 「見清氣的鳥，恁攏通食伊。
14:12 呣通食的就是鷹、鴞、鵰、
14:13 鸇、小鷹、鵪及伊的類，
14:14 一切的烏鴉及伊的類，
14:15 鴕鳥、公的鴕鳥、魚鷹、雀鷹及伊的類，
14:16 暗光鳥、鴣黃、貓頭鷹、
14:17 梯鶘、臭頭鷹、鸕鶿、
14:18 鶴、白鷺鷥及伊的類、戴鵀鳥、蝙蝠。
14:19 見有翅會趖的物，對佇恁就無清氣，恁攏呣通食伊。
14:20 見會飛清氣的物，恁攏通食。
14:21 「見家己死的物，恁攏呣通食，通互恁門內寄腳的人食，抑是賣互外國人食，因為你是聖的百姓，屬佇耶和華──你的上帝。「煮山羊仔，呣通用伊的母的奶。」
14:22 「你著將你撒種所出產的，就是你的田園逐年所出的，十份抽一份；
14:23 你的五殼、酒、油十份的一份，及牛羊頭水生的，你著食伊佇耶和華──你上帝的面前，就是伊所欲揀來安置伊的名的所在。互你學習常常敬畏耶和華──你的上帝。
14:24 當耶和華──你的上帝賜福你的時，耶和華──你的上帝所欲揀安置伊的名的所在若離開你太遠，彼條路太長，致到你會帶諸個物到遐，
14:25 你就通換銀，將銀包起來，勒佇你的手內，去耶和華──你的上帝所欲揀的所在。
14:26 你用此個銀，照心所愛買伊，或是牛，或是羊，或是酒，或是厚酒，見若你的心所意愛的；佇遐你及你的家眷佇耶和華──你上帝的面前食來歡喜。
14:27 「踮佇你門內的利未人，你呣通放拺伊，因為伊佇恁中間無份無業。
14:28 逐擺到三年滿，你著將彼年的土產十份抽一份，囥佇你的門內。
14:29 因為利未人佇恁中間無份無業，伊及出外人，以及孤兒寡婦，踮佇恁門內的，攏通來食到飽。致到耶和華──你的上帝佇你所做一切的事賜福你。」