9:1 論到服事聖徒的事，我寫批互恁算是加工；
9:2 因為我知恁的熱心，才將此個對馬其頓人為著恁誇口，講亞該亞對舊年已經便；閣恁的熱心有感激多多人。
9:3 總是我差諸個兄弟，互恁先備辦照我所講。
9:4 免得阮佇此個事所為著恁誇口的歸佇空空。驚了有馬其頓人及我來，看見恁未有便，阮就為著深信恁致到見誚；恁的，我免講。
9:5 所以，我想的確著勸諸個兄弟量早去恁遐，來代先窮恁前所允的恩惠，通顯明恁的備辦便是對恩惠，呣是對勉強。
9:6 若是我講：「少種的少收，多種的多收」。
9:7 逐人照伊心內所有定著的，莫得煩惱，莫得勉強，因為歡喜提出的，上帝疼伊。
9:8 閣上帝會互逐項的恩典充滿到佇恁，互恁凡事常常充足，通行逐項的好事有夠滿滿。
9:9 照所記載講：伊有大捨施，伊有賑濟喪鄉人；伊的義永永佇。
9:10 閣賞賜種子互撒的，也賞賜米糧互人食的上帝，伊欲賞賜恁通撒的種子多多，也欲加添恁行義的果子；
9:11 互恁凡事充足，到有逐樣的好心，此個好心就是託仗阮來致到人感謝上帝的。
9:12 因為此個服事的工，呣是補足聖徒的欠缺若定，閣續會互多多人感謝上帝。
9:13 對此個工的經驗來歸榮光上帝，是因為恁承認基督的福音來順服，閣因為恁好心款待及眾人。
9:14 閣為著上帝所賞賜恁極大的恩，替恁祈禱，來戀慕恁。
9:15 感謝上帝，為著伊講盡的恩賜！
