6:1 阮及主同著磨的，亦勸恁呣通空空受上帝的恩；
6:2 因為伊講：「佇得著接納的時我有聽你；佇拯救的日我有幫助你。」你看！此霎是受接納的時；你看，此霎是拯救的日。
6:3 阮一概無塞礙人，免得此個職份犯嫌；
6:4 就是凡事證明本身合佇做上帝的差用，是佇多多吞、患難、欠缺、困迫、
6:5 受拍、關監、擾亂、著磨、無睏、無食、
6:6 廉潔、智識、寬容、仁慈、聖神的感化、無假的疼、
6:7 真理的道、上帝的權能；用義的戰器佇左右；
6:8 無論榮光凌辱、歹名聲、好名聲；親像騙人的，其實是誠實的；
6:9 親像人呣知，其實多多人知；親像欲死，其實是活；親像受責罰，其實無致到死；
6:10 親像煩惱，其實常常快樂；親像喪鄉，其實互多多人富；親像無有，其實是無呣有。
6:11 哥林多人啊，阮向恁嘴開開，心闊闊。
6:12 呣是對阮互恁狹窄，是佇恁的心家己狹窄。
6:13 今恁著學此個款，家己開闊來報答阮。我講按呢是親像對家己的細子來講。
6:14 莫得及呣信的人做伴，因為義及不義有甚麼相通？光及暗有甚麼交陪？
6:15 基督及彼列有甚麼和合？信及呣信有甚麼干涉？
6:16 上帝的殿及偶像有甚麼相同？因為咱是真活上帝的殿，親像上帝有講：我欲徛起佇中間，行遊佇中間；我欲做的上帝；也欲做我的百姓。
6:17 所以照主所講的：恁著對中間出來，家己分別；莫得摸無清氣的物，我就接納恁。
6:18 我欲做恁的父；恁欲做我的子，查某子。這是全能的主講的。