6:1 彼時，所羅門講：耶和華曾講伊欲踮佇黑黑暗暗的中間。
6:2 總是我已經起一間殿互你徛起，做你永遠住的所在。
6:3 王越轉伊的面祝福以色列的會眾，以色列會眾攏徛起來。
6:4 伊講：「耶和華──以色列的上帝是應該謳咾者！因為伊親嘴對我的父大衛所應允的，親手應驗伊。
6:5 講：『對我導我的百姓出埃及地以來，我未曾佇以色列眾支派中揀一個城來起殿互我的名踮佇遐，也未曾揀人做我的百姓以色列的仁君；
6:6 獨獨揀耶路撒冷互我的名踮佇遐，閣揀大衛治理我的百姓以色列。』
6:7 「我的父大衛心內有意思，欲為耶和華──以色列的上帝的名起殿，
6:8 總是耶和華對我的父大衛講：『你的心有意思欲為我的名起殿，你此個意思真好；
6:9 獨獨你呣通起殿，你所親生的子欲為我的名起殿。』
6:10 「今耶和華應驗伊所講的話，我照耶和華的話起來續接我的父大衛，坐以色列的國位，閣為耶和華──以色列上帝的名起殿。
6:11 我安置約櫃佇遐，櫃內有耶和華的約，就是伊及以色列人所立的約。」
6:12 王當以色列會眾的面前，徛佇耶和華的壇前，抬起手，（
6:13 因為所羅門曾造一個銅台，長五肘，闊五肘，高三肘，下佇院中），就徛佇台頂，當以色列會眾的面前跪落去，抬起手向天，
6:14 講：「耶和華──以色列的上帝啊，佇天裡，佇地裡無有上帝親像你！守約行慈愛佇你許個奴僕，就是盡心行佇你的面前者；
6:15 你對你的奴僕──我的父大衛所應允的你有守伊。你親嘴講的，親手應驗伊，照今仔日的款。
6:16 耶和華──以色列的上帝啊，你所應允你的奴僕──我的父大衛講：『你的子孫若謹慎的所做，行我的律法，親像你行佇我的面前，就屬佇你的欲佇我的面前坐以色列的國位永無斷。』今求你應驗伊。
6:17 耶和華──以色列的上帝啊，你對你的奴僕大衛所講的，求你互伊成做實事。
6:18 「上帝豈真正欲及世間人徛起地上嗎？看啊，天及諸個天的天尚且無夠額互你徛起，何況我所起此間殿啊？
6:19 耶和華──我的上帝啊，願你俯落數念你的奴僕的祈禱懇求，來聽你的奴僕所祈禱佇你的面前的求叫祈禱。
6:20 願你日暝看顧此個殿，就是你所講起欲安置你的名佇遐的所在；來聽你的奴僕所欲向此所在祈禱的祈禱。
6:21 你的奴僕及你的百姓以色列向此所在祈禱的時，願你聽的祈求，願你對天你徛起的所在來聽，你聽見的時就赦免。
6:22 「人若得罪伊的厝邊，也有人用一個咒誓教伊咒誓，伊若來此間殿，佇你的壇前咒誓，
6:23 求你對天聽來辦理伊，審判你諸個奴僕，定歹人的罪，照伊所行的報應佇伊的頭殼；定義人做義，照伊的義來互伊。
6:24 「設使你的百姓以色列因為得罪你，才輸佇對敵的面前，若歸向你認你的名，閣佇此間殿祈禱懇求你，
6:25 求你對天聽，來赦免你的百姓以色列的罪，互倒來你所賞賜，及列祖的地。
6:26 「設使得罪你，致到天關密無落雨，你刑罰的時，若向此所在祈禱，認你的名，離開的罪，
6:27 求你佇天裡聽，赦免你的奴僕及你的百姓以色列的罪，佇你教示所著行的好路的時，閣落雨佇你的地，就是你賞賜你的百姓做業的。
6:28 「此個地若有飢荒、瘟疫、枯焦、朽爛、草蜢、剪蟲，抑是許個對敵，佇許個城的地圍困，無論有甚麼災禍甚麼破病，
6:29 或是一人，或是你的百姓以色列的眾人，逐個知家己心內的災禍憂悶，向此間殿抬起手，無論怎樣懇求，怎樣祈禱，
6:30 願你對天裡你所徛起的所在來聽伊，來赦免伊。你知的心，照逐人的行做來款待（因為世間人的心只有你知若定），
6:31 互佇你賞賜阮列祖的地一世人敬畏你，行你的道路。
6:32 「論到外邦人，呣是屬你的百姓以色列的，為著你的大名大權能的手，伸出的手骨，對遠遠的所在來，若來向此間殿祈禱，
6:33 願你對天，你徛起的所在來聽，照外邦人一切所對你求的來行，互天下萬百姓攏識你的名，敬畏你，親像你的百姓以色列一樣，閣互知我所起此間殿，是用你的名來稱的。
6:34 「你的百姓若出去你所差去的路，及對敵交戰，向你所揀此個城，及我為著你的名所起的殿來祈禱你，
6:35 願你對天來聽的祈禱懇求，來保護的義。
6:36 「你的百姓若得罪你（因為無有無犯罪的人），你受氣，將交互對敵，致到掠到或是遠或是近的地；
6:37 若佇所掠去的地，心內倒轉想來反悔，閣佇掠的人的地，懇求你講：『阮有罪，阮有悖逆，阮有做歹』；
6:38 若佇受掠去的地，就是對敵掠去的地，盡心盡性歸服你，閣向本地，就是你賞賜列祖的地及你所揀的城，以及我為著你的名所起的殿來祈禱你，
6:39 願你對天你所徛起的所在聽的祈禱懇求，來保護的義，閣赦免你的百姓得罪你的。
6:40 「我的上帝啊，今我求你目睭看，耳孔聽佇此所在所獻的祈禱。
6:41 耶和華上帝啊，求你起來，你及你能力的櫃，入你安息的所在。耶和華上帝啊，願你的祭司穿救恩；願你許個聖的百姓，得著福氣來歡喜。
6:42 耶和華上帝啊，求你莫得拒絕你受抹油者，著記念你施互你的奴僕大衛的慈愛。」