27:1 約坦坐位的時二十五歲，佇耶路撒冷做王歷過十六年，伊的老母名叫耶路沙，是撒督的查某子。
27:2 約坦行耶和華所看做好的事，照伊的老父烏西雅一切所行的，獨獨無入耶和華的殿。總是百姓所行猶原腐敗。
27:3 約坦起耶和華殿的頂門，閣佇俄斐勒城頂起多多，
27:4 閣佇猶大山地起城，佇樹林內起營寨及望高樓。
27:5 伊及亞捫人的王交戰卡贏，當彼年亞捫人進貢銀一百他連得，小麥一萬歌珥，大麥一萬歌珥；第二年、第三年亞捫人也是按呢進貢。
27:6 約坦漸漸強盛，因為伊佇耶和華──伊的上帝的面前謹慎行正直的路。
27:7 約坦其餘的事及一切的交戰，攏記佇以色列及猶大列王的記錄。
27:8 伊坐位的時二十五歲，佇耶路撒冷做王歷過十六年。
27:9 約坦及伊的列祖同睏，埋葬佇大衛城。伊的子亞哈斯接伊做王。