19:1 猶大王約沙法平安倒去耶路撒冷，到伊的厝。
19:2 先見哈拿尼的子耶戶出來迎接約沙法王，給伊講：「你幫助歹人，疼怨恨耶和華的人合宜嗎？因為按呢耶和華的受氣臨到你。
19:3 若是你猶有好事佇，因為你對此個地方除去亞斯他錄，閣定著你的心尋上帝。」
19:4 約沙法踮佇耶路撒冷，後來閣出去巡視百姓的中間，對別是巴到以法蓮山地，導百姓歸向耶和華──列祖的上帝；
19:5 閣設立審判官佇境內佇猶大堅固的城，逐個城攏按呢，
19:6 給許個審判官講：「謹慎恁的所做；因為恁審判呣是為著人，是為著耶和華。恁審判的時，伊及恁佇。
19:7 今恁著驚畏耶和華，謹慎做代誌；因為耶和華──咱的上帝無有不義，無偏袒，無收賄賂。」
19:8 約沙法對利未人及祭司，及以色列族長中設立人，佇耶路撒冷為耶和華判斷代誌，及相告，伊就倒去耶路撒冷。
19:9 伊閣命令講：「恁著驚畏耶和華，盡忠誠實心來行此個代誌。
19:10 見若恁的兄弟踮佇許個城者，若有冤家的事來就近恁，無論甚麼代誌，或是為著流血，抑是佇律法及誡命，抑是律例及法度的中間，恁著警戒，呣通得罪耶和華，致到受氣臨到恁及恁的兄弟；恁按呢做，就無罪。
19:11 看啊！見若屬耶和華的事，有祭司頭亞瑪利雅管理恁；見若屬王的事，有猶大的族長以實瑪利的子西巴第雅管理恁；佇恁的面前有利未人做官長。恁著好膽做代誌，願耶和華及好人佇。」