5:1 莫得責備老人，著勸伊親像老父；少年人親像兄弟；
5:2 老婦仁人親像老母；少年婦仁人親像姊妹；著專務清氣。
5:3 真正守寡的寡婦著尊敬伊。
5:4 若是守寡婦仁人有子，抑是孫，著代先學有孝佇伊家己的家，來報答的序大人，因為這是得著接納佇上帝的面前。
5:5 真正做寡婦、無依倚的，只有向望上帝，暝日常常求叫祈禱。
5:6 若是奢侈的，雖然活已經死。
5:7 諸個事著吩咐，互無毛病。
5:8 人若無顧親人，甚至無顧家己的家，這就是悖謬道理，比呣信的人閣卡歹。
5:9 寡婦記佇冊裡的，的確著上六十歲，曾做一個丈夫的婦仁人，
5:10 閣有好所行的證據，曾養飼子兒，接待人客，洗聖徒的腳，賑濟受患難的人，趁一切的好所行。
5:11 若是少年的寡婦，著辭伊；因為到動起情慾，來逆基督的時就想欲嫁。
5:12 因為放拺起頭的信，就受擬斷；
5:13 閣學貧憚，過厝過宅；呣若貧憚，也厚話，愛插事，講所呣應該講的。
5:14 所以我愛少年的寡婦閣嫁，生子，料理家，無互對敵有機會通講歹話。
5:15 因為已經有人越轉去隨撒但。
5:16 若是信主的婦仁人，伊的皆親有寡婦，就著幫助伊，免致連累教會，互教會通幫助許個真正做寡婦的。
5:17 治理教會的長老，著加倍尊敬伊；許個著磨佇講道理及教示的，閣卡著按呢。
5:18 因為聖經講：「磨五殼的牛，莫得籠伊的嘴」；閣：「做工的堪得受伊的工錢。」
5:19 有告長老的，若呣是有二三個做干證，就莫得接納。
5:20 犯罪的，著當眾人的面前責備，互其餘的也通驚惶。
5:21 我佇上帝及基督耶穌以及受揀的天使的面前命令你：著守諸個事，莫得固執所存的意見，行代誌莫得偏私。
5:22 莫得趕緊給人按手；也莫得有份佇別人的罪，家己著顧清氣。
5:23 莫得閣干單飲水，著用淡薄酒，因為你的脾胃，及你的厚破病的緣故。
5:24 有人的罪露現，做頭前行到佇審判；有的的罪隨的後面。
5:25 親像按呢，好的所行也有露現的，許個呣是按呢的也蓋密。