3:1 「人若欣慕監督的職，伊是憶著好的工。」此句話是真實。
3:2 所以做監督的，應該著無通嫌，做一個婦仁人的丈夫，呣通好酒，著守己，端正，好款待出外人，教示；
3:3 無因為酒起事，無拍人，著溫柔，無相爭，無貪財；
3:4 整齊家己的家，用端莊互子兒順服。
3:5 因為人若曉得整齊家己的家，欲怎樣照顧上帝的教會啊？
3:6 抵仔入教的呣通互伊做監督，驚了家己品嗙，來陷落佇魔鬼所受的審判。
3:7 閣佇教會外著有好名聲，驚了抵著人的詈罵，陷落魔鬼的活罩。
3:8 按呢做執事的，也著端莊，無二樣話，無愛飲多多酒，無貪不義的錢；
3:9 著存清氣的良心，顧守信道的奧妙。
3:10 親像此號人著代先試驗伊，若無通嫌，才通互做執事。
3:11 按呢婦仁人也著端莊，無誹謗，無好酒，凡事忠信。
3:12 執事著做一個婦仁人的丈夫，整齊的子兒及家己的家。
3:13 因為做執事的，家己得著好的地位，閣佇基督耶穌的道理有大大好膽。
3:14 我寫諸個互你，是向望本身緊緊到你遐。
3:15 設使若延延，也是互你通知應該著怎樣行佇上帝的厝。就是真活上帝的教會，真理的柱石及地基。
3:16 大啊，敬虔的奧妙，無人呣掠做著！就是伊顯現佇肉體，稱做義佇神，出現佇天使，宣傳佇外邦，互人信佇世間，接納佇榮光。