2:1 所以我所勸勉的，第一就是替眾人懇求、祈禱、求恩、祝謝；
2:2 替諸個王及攏總的官府求，互咱凡事敬虔、端莊，通安然恬靜來過日。
2:3 這是好，閣得著接納佇救咱的上帝的面前。
2:4 伊愛眾人得著救，也深知真理。
2:5 因為上帝是一個，上帝及人的中間，中保也是一個，就是做人的基督耶穌；
2:6 伊為著眾人獻本身，做替贖的價錢，有及時證明。
2:7 因為按呢我受設立做宣傳的，做使徒，用信用真實做外邦的教師，我所講是真實無白賊。
2:8 所以我愛查甫人抬起聖的手，無受氣，無僥疑，逐所在祈禱；
2:9 也愛婦仁人打扮素素，用廉恥、守己，家己妝飾，呣是用編頭毛，及金器，抑是真珠，抑是值錢的衣裳，
2:10 是用好所行做妝飾，這是家己認做敬上帝的婦仁人所合宜的。
2:11 婦仁人著恬靜，一味降服來學習。
2:12 我呣准婦仁人傳教，抑是管轄查甫人，獨獨著恬靜。
2:13 因為亞當代先受造，然後才夏娃，
2:14 閣亞當無受欺騙，獨獨婦仁人受欺騙，來陷落罪。
2:15 總是，若佇信及仁愛，及成聖兼節制，伊就欲對生子來得救。