1:1 保羅、及西拉，以及提摩太批寄互帖撒羅尼迦人的教會，就是佇父上帝及主耶穌基督的。願恁得著恩典、平安！
1:2 阮為著恁眾人常常感謝上帝，佇祈禱的中間數念恁，
1:3 佇上帝咱的父的面前，長長數念恁有信就行做，有仁愛就著磨，有向望咱的主耶穌基督就吞。
1:4 上帝所疼的兄弟啊，阮知恁的受揀選；
1:5 因為阮的福音到佇恁，呣是在佇講話若定，是在佇權能在佇聖神，及堅固的信，親像恁知阮佇恁中間，為著恁來成做甚麼等號的人。
1:6 閣恁已經佇多多苦難，用聖神所賞賜的歡喜，來承受道理，就學阮也學主；
1:7 致到恁做馬其頓、亞該亞攏總信的人的模樣。
1:8 因為主的道理對恁傳出。呣若佇馬其頓及亞該亞若定，就是恁向上帝的信已經逐所在報揚；致到阮呣免講甚麼。
1:9 因為家己報明講阮到恁中間是甚麼款，也恁怎樣有離開偶像，歸佇上帝，來服事活閣真的上帝，
1:10 也聽候伊的子對天落來，就是伊對死人中互伊復活的耶穌──是彼個拯救咱出將來的受氣者。