5:1 兄弟啊，論到時期，呣免寫批互恁；
5:2 因為恁家己詳細知，主的日到，親像賊透暝來。
5:3 人當講「平安穩當」的時，災禍忽然到佇，親像生子的艱苦到佇有娠孕的婦仁人一樣。許個人會走離。
5:4 若是兄弟啊，恁呣是佇暗的中間，致到彼日親像賊來著恁。
5:5 因為恁攏是光明的人，日時的人。咱呣是屬佇暝時的，也呣是黑暗的。
5:6 所以咱呣通親像其餘的人睏，著警醒節制。
5:7 因為睏的人是暝時睏，酒醉的人是暝時醉。
5:8 若是咱屬日時的著節制，穿信及仁愛做護心鏡，用得救的向望做頭盔。
5:9 因為上帝定著咱呣是來抵著受氣，就是欲對咱的主耶穌基督來得著救。
5:10 伊替咱死，互咱或是醒、或是睏，及伊同活。
5:11 所以，著相安慰，大家相建立德行，照恁所做的。
5:12 兄弟啊，阮求恁凡若佇恁中間著磨，佇主治理恁、警戒恁的。
5:13 恁著識伊，為著所做的工，恁著佇仁愛大大尊敬。恁大家著和睦。
5:14 兄弟啊，阮勸恁著警戒許個無法度者，安慰許個餒志者，扶持許個軟弱者，用寬容款待眾人。
5:15 謹慎，莫得用歹報歹；或是大家相款待，抑是款待眾人，著常常追彼個好。
5:16 著常常歡喜，
5:17 著祈禱無息，
5:18 凡事感謝；因為此個是上帝佇基督耶穌向恁的旨意。
5:19 呣通拍熄聖神；
5:20 呣通看輕先知的話。
5:21 凡事著察驗，好的著執守，
5:22 著離開逐樣的歹。
5:23 願平安的上帝家己互恁一盡成聖！閣願恁的神及魂以及身軀，佇咱的主耶穌基督閣來的時，攏得著保全，無通嫌！
5:24 召恁的是信實，伊也欲成伊。
5:25 兄弟啊，著替阮祈禱。
5:26 著用聖的相唚來請安攏總的兄弟。
5:27 我指主來吩咐恁，用此張批讀互眾兄弟聽。
5:28 願咱的主耶穌基督的恩典及恁佇！