4:1 所疼的兄弟，諸個神，呣通攏總信，獨獨著試驗諸個神是對上帝抑呣是，因為有多多假先知出來入世間。
4:2 恁對此個識上帝的神；見若神有認耶穌基督已經佇肉體臨到的，就是對上帝來。
4:3 見若神呣認耶穌的，呣是對上帝來，這也是對敵基督者的神。恁有聽見伊來，現在伊也已經佇世間啦。
4:4 細子啊，恁是對上帝來，閣已經卡贏；因為佇恁的，卡大佇世間的。
4:5 是對世間來，所以講話也對世間，世間也聽。
4:6 咱是對上帝來，識上帝的聽咱；呣是對上帝來的，無聽咱。真實的神及差謬的神，咱對按呢識伊。
4:7 所疼的兄弟啊，咱著相疼，因為疼是對上帝來。見若疼的是對上帝生，閣識上帝。
4:8 無疼的，呣識上帝，因為上帝是疼。
4:9 上帝差伊獨生的子入世間，互咱對伊來活，上帝的疼對此個顯明佇咱。
4:10 呣是咱曾疼上帝，是伊曾疼咱，差伊的子為著咱的罪做挽回的祭，疼就是在佇此個的。
4:11 所疼的兄弟啊，上帝若疼咱到按呢，就咱也著相疼。
4:12 從來未有人看見上帝，咱若相疼，就上帝佇咱，也伊的疼完全佇咱。
4:13 伊已經用伊的神賞賜咱，咱對按呢知咱佇伊，也伊佇咱。
4:14 父差伊的子做世間的救主；阮曾看見也做干證。
4:15 見若認耶穌做上帝的子的，就上帝佇伊，伊也佇上帝。
4:16 上帝所有疼咱的，咱也知也信。上帝就是疼；閣人佇疼，就是佇上帝，上帝也佇伊。
4:17 對按呢，疼成做完全佇咱，互咱佇審判的日會好膽。因為伊甚麼款，咱佇世間也按呢。
4:18 佇疼的內面無驚惶；獨獨齊全的疼，趕出驚惶。因為驚惶就有刑罰，見若驚惶的佇疼未有齊全。
4:19 咱有疼，因為伊代先疼咱。
4:20 若有人講「我疼上帝」，也怨恨伊的兄弟，就是白賊的；因為無疼所有看見的兄弟的，就疼所未看見的上帝。
4:21 疼上帝的，也著疼伊的兄弟，這是咱對伊所受的命令。