4:1 人著掠阮做基督的差用，做上帝諸個奧妙的管家。
4:2 閣所向望佇管家的，是愛得伊盡忠。
4:3 若是我互恁抑是別人批評，我掠做極小可的事；我也無家己批評。
4:4 因為我呣知家己有甚麼通責備，總是我無對此個得著稱做義；獨獨批評我的就是主。
4:5 所以，時未到，恁莫得批評甚麼，聽候主到，伊欲用光照佇黑暗諸個隱密的事，顯明諸個心內的計謀。彼時，逐人欲對上帝得著伊的謳咾。
4:6 兄弟啊，我為著恁諸個，借本身及亞波羅來講起諸個代誌，是欲互恁佇款待阮的事來學習此句，莫得過頭佇所記載，免得恁自高，尊重此個，看輕彼個。
4:7 因為是誰互你各樣佇別人啊？你所有的叨落一項呣是對受的？若是對受的，怎樣誇口，那親像呣是對受的啊？
4:8 恁已經飽足！已經富有！恁已經做王！阮無份。我真正愛恁做王，互阮也及恁相及做王。
4:9 因為我想上帝有安置阮諸個使徒佇尾溜，親像擬死的犯人；因為阮成做一棚戲，互世間及天使及人看。
4:10 阮為著基督做戇，恁佇基督做智慧；阮軟弱，恁勇壯；恁尊貴，阮卑賤。
4:11 到佇此霎，阮也枵也嘴乾，褪腹裼，互人掙，無定著的所在，
4:12 也勞苦，親手做工。受詈罵，就給人祝福；受窘逐，就吞；
4:13 受誹謗，就及人好嘴。竟然成做世間的糞埽，萬物的渣滓，到佇今仔日。
4:14 我寫諸個，呣是欲互恁見誚，是警戒恁，親像我所疼的子。
4:15 因為恁佇基督，先生雖然講萬，若是老父就無多個，因為佇基督耶穌，我曾對福音來生恁。
4:16 所以，我勸恁著學我。
4:17 因為按呢我已經差提摩太去恁遐。伊佇主，是我所疼閣盡忠的子。伊欲互恁記得我佇基督的行踏，就是親像我逐所在佇逐個教會所教示的。
4:18 有人自高，掠做我無欲到恁遐；
4:19 總是，主若允准，我欲緊緊去就近恁，閣我所欲知的，呣是許個自高的人的話，就是的權能。
4:20 因為上帝的國不在講話，是在佇權能。
4:21 恁愛怎樣？我就近恁著抬箠仔去？抑是用仁愛及溫柔的心神啊？