18:1 此霎了後，大衛拍非利士人，互降服，閣對非利士人的手取迦特及伊的鄉里；
18:2 閣拍摩押，摩押人就服事大衛，來進貢伊。
18:3 瑣巴王哈大利謝去伯拉河，欲堅固伊的國權，大衛就拍伊，直到哈馬，
18:4 大衛搶伊的戰車一千張，馬兵七千，步兵二萬，拖車的馬大衛就割伊大腿的筋，其中只有留一百張車的馬。
18:5 大馬色的亞蘭人來幫助瑣巴王哈大利謝，大衛就亞蘭人二萬二千人。
18:6 對按呢大衛佇大馬色的亞蘭地設立防守的兵營，亞蘭人就降服大衛，來進貢伊。大衛無論叨落去，耶和華攏互伊得勝。
18:7 大衛搶哈大利謝諸個奴僕金的屏牌帶到耶路撒冷。
18:8 大衛閣對哈大利謝所管的提巴及均二個城搶多多銅。就是所羅門所用來造銅海及柱，以及諸個銅器的。
18:9 哈馬王陀烏聽見大衛拍贏哈大利謝的全軍，
18:10 就差伊的子哈多蘭去見大衛王，給伊請安，也給伊祝福，因為伊有及哈大利謝交戰來卡贏伊（本然哈大利謝及陀烏常常有交戰的緣故）。哈多蘭續帶金銀銅諸個器具。
18:11 大衛王將諸個器具，及對逐國帶來的金銀，攏分別做聖獻互耶和華，就是伊對以東、摩押、亞捫族、非利士人、亞瑪力所搶來的。
18:12 洗魯雅的子亞比篩佇鹽的山谷以東人一萬八千。
18:13 伊佇以東地設立防守的兵營，以東人就攏降服大衛。大衛無論叨落去，耶和華攏互伊得勝。
18:14 大衛做以色列全國的王，閣佇眾百姓的中間秉公行義。
18:15 洗魯雅的子約押做元帥；亞希律的子約沙法做史官；
18:16 亞希突的子撒督及亞比亞他的子亞希米勒做祭司；沙威沙做書記官；
18:17 耶何耶大的子比拿雅管轄基利提人及比利提人。大衛的眾子攏佇王的身邊做頭人。